கென்யா தலைநகர் நைரோபியில் பதற்றமான சூழல் நிலவி வருகிறது. விலைவாசி உயர்வு மற்றும் புதிய வரி விதிப்புகளை கண்டித்து இளைஞர்கள் மீண்டும் போராட்டத்திற்கு அழைப்பு விடுத்துள்ள நிலையில், தலைநகரின் முக்கியப் பகுதிகளில் ராணுவத்தினரும் கலவரத் தடுப்புப் படைகளும் குவிக்கப்பட்டுள்ளனர்.
கென்யாவில் கடந்த 2024-ம் ஆண்டு, கூடுதல் வரி விதிப்புக்கு எதிராக 'ஜென்-சி' இளைஞர்கள் நடத்திய வரலாற்றுச் சிறப்புமிக்க போராட்டத்தின் போது, துப்பாக்கிச் சூட்டில் 120-க்கும் மேற்பட்டோர் உயிரிழந்தனர் என்பது குறிப்பிடத்தக்கது. அந்த சோகமான நிகழ்வுக்குப் பின்னர், இப்போது மீண்டும் நீதி கேட்டும், தொடர் விலைவாசி உயர்வைக் கண்டித்தும், சமூக வலைத்தளங்கள் மூலம் இளைஞர்கள் போராட்டத்திற்கு அழைப்பு விடுத்துள்ளனர்.
இந்த பிரம்மாண்ட போராட்டத்தை ஒட்டி, தலைநகர் நைரோபியின் முக்கிய சாலைகள் அனைத்தையும் போலீசார் முற்றிலும் முடக்கி 'சீல்' வைத்துள்ளனர். திக்கா, மொம்பாசா உள்ளிட்ட நெடுஞ்சாலைகளில் ஆயுதம் ஏந்திய போலீசார் சோதனைச் சாவடிகளை அமைத்து வாகனங்களை தீவிரமாக சோதனை செய்து வருகின்றனர்.
நாடாளுமன்றம் மற்றும் அதிபர் மாளிகையைச் சுற்றி முள்கம்பி வேலிகள் அமைக்கப்பட்டுள்ளன. மேலும், அப்பகுதிகளில் கலவரத் தடுப்புப் படைகள் மற்றும் ராணுவத்தினர் குவிக்கப்பட்டுள்ளனர். எந்தவொரு கலவர சூழலையும் சமாளிக்கும் வகையில் பாதுகாப்புப் படையினர் தயார் நிலையில் வைக்கப்பட்டுள்ளனர்.
பொதுப் போக்குவரத்து முற்றிலும் முடங்கியுள்ளதால், ஆயிரக்கணக்கான பொதுமக்கள் நீண்ட தூரம் நடந்து செல்லும் நிலை ஏற்பட்டுள்ளது. கடைகள், வணிக நிறுவனங்கள் பலவும் மூடப்பட்டுள்ளன. முக்கிய பகுதிகளில் பள்ளிகள் மற்றும் அலுவலகங்களுக்கு விடுமுறை அறிவிக்கப்பட்டுள்ளதாக தகவல்கள் தெரிவிக்கின்றன.
நைரோபி நகரில் பயணம் செய்யும் வெளிநாட்டவர்கள் மிகுந்த எச்சரிக்கையுடன் இருக்குமாறு அறிவுறுத்தப்பட்டுள்ளனர். போராட்டப் பகுதிகளைத் தவிர்க்கவும், உள்ளூர் அதிகாரிகளின் அறிவுறுத்தல்களைப் பின்பற்றவும் பரிந்துரைக்கப்பட்டுள்ளது.
இந்தப் பதற்றமான சூழலில், விலைவாசி உயர்வு மற்றும் வரி விவகாரங்களில் அரசாங்கம் எடுக்கும் அடுத்த கட்ட நடவடிக்கைகளையும், இளைஞர்களின் போராட்டம் எந்த அளவுக்கு விரிவடையும் என்பதையும் உலகம் கவனித்து வருகிறது.
