வெனிசுலாவில் அடுத்தடுத்து ஏற்பட்ட சக்திவாய்ந்த நிலநடுக்கங்களில் உயிரிழந்தவர்களின் எண்ணிக்கை 164 ஆக அதிகரித்துள்ளது. 970-க்கும் மேற்பட்டோர் காயமடைந்துள்ளதாக இடைக்கால அதிபர் டெல்சி ரோட்ரிக்ஸ் தெரிவித்துள்ளார். மிகக் கடுமையாகப் பாதிக்கப்பட்ட லா குவைரா மாநிலம், பேரிடர் மண்டலமாக அறிவிக்கப்பட்டுள்ள நிலையில், நாடு முழுவதும் அவசரநிலை பிறப்பிக்கப்பட்டுள்ளது.
வியாழக்கிழமை மாலை 7.2 மற்றும் 7.5 ரிக்டர் அளவில் இரு நிலநடுக்கங்கள் ஒரு நிமிட இடைவெளியில் பதிவாகின. தலைநகர் காரகஸில் இருந்து மேற்கே 168 கி.மீ. தொலைவில் உள்ள மோரோன் பகுதியை மையமாகக் கொண்டு 22 கி.மீ. ஆழத்தில் முதல் அதிர்வும், அதனைத் தொடர்ந்து தென் மேற்கே 16 கி.மீ. தொலைவில் 10 கி.மீ. ஆழத்தில் இரண்டாவது அதிர்வும் ஏற்பட்டன. 1900-க்குப் பிறகு வெனிசுலாவைத் தாக்கிய மிகப் பெரிய நிலநடுக்கம் இதுவாகும்.
இடிந்து விழுந்த கட்டிடங்களில் மீட்புப் படையினர் தேடுதல் பணியில் ஈடுபட்டுள்ள நிலையில், உயிரிழப்பு எண்ணிக்கை மேலும் அதிகரிக்கும் அபாயம் உள்ளதாக அதிபர் எச்சரித்துள்ளார். லா குவைரா பகுதியில் டஜன் கணக்கான கட்டிடங்கள் இடிந்து விழுந்துள்ளன. மீட்புப் பணிகள் தொடர்ந்து கடினமாக நடைபெற்று வருவதாகவும், மக்கள் விழிப்புடன் இருக்குமாறும் அவர் கேட்டுக்கொண்டார். இருப்பினும், நிலநடுக்கத்தில் ஆயிரக்கணக்கானோர் உயிரிழந்திருக்கக் கூடும் என அமெரிக்க புவியியல் ஆய்வு மையம் கணித்துள்ளது.
இந்தப் பேரிடருக்கு உதவும் வகையில் அமெரிக்க அதிபர் டொனால்டு டிரம்ப், நிவாரணப் பணிகளுக்கு உத்தரவிட்டுள்ளார். பிரதமர் நரேந்திர மோடி, வெனிசுலா மக்களுக்கு ஆழ்ந்த இரங்கலைத் தெரிவித்ததோடு, சாத்தியமான அனைத்து உதவிகளையும் வழங்க இந்தியா தயாராக இருப்பதாக அறிவித்துள்ளார். இதற்கு வெனிசுலா அதிபர் நன்றி தெரிவித்துள்ளார். மேலும், பிரான்ஸ், ஸ்பெயின் உள்ளிட்ட நாடுகளும் மீட்புக் குழுக்களை அனுப்ப முன்வந்துள்ளன. இந்தக் கடினமான காலகட்டத்தில் சர்வதேச ஒத்துழைப்பு வெனிசுலாவுக்கு கிடைத்துள்ளது.
