தமிழ், தெலுங்கு, இந்தி உள்ளிட்ட பல மொழி திரைப்படங்களில் தனித்துவமான நடிப்பால் ரசிகர்களை கவர்ந்துள்ள பிரகாஷ்ராஜ், தற்போது தனிப்பட்ட காரணத்தால் மீண்டும் பேசுபொருளாகியுள்ளார்.
400-க்கும் மேற்பட்ட படங்களில் நடித்துள்ள அவர், இயக்குநர் பாலச்சந்தர் இயக்கிய டூயட் படத்தின் மூலம் தமிழில் அறிமுகமானவர். எந்த கதாபாத்திரமாக இருந்தாலும் இயல்பாக வெளிப்படுத்தும் திறனால் தனித்த இடத்தைப் பெற்றுள்ளார்.
சமீபத்தில் உடல்நலக் குறைவு காரணமாக சிகிச்சை பெற்று வந்த அவரது தாயார் ஸ்வர்ணலதா (86) உயிரிழந்தார். கிறிஸ்தவ மத நம்பிக்கைகளை பின்பற்றிய அவருக்கு தேவாலயத்தில் மரபுப்படி இறுதி சடங்குகள் நடத்தப்பட்டன.
ஆனால், இந்த நிகழ்வின் வீடியோக்கள் சமூக வலைதளங்களில் வெளியாகியதும், சிலர் விமர்சனம் எழுப்பினர். முன்னதாக தன்னை நாத்திகர் என கூறியிருந்த பிரகாஷ் ராஜ், ஏன் மத மரபுகளின் படி சடங்கு செய்தார் என கேள்வி எழுப்பப்பட்டது.
இதற்கு பதிலளித்த பிரகாஷ் ராஜ், மிகவும் தெளிவான மற்றும் மனிதநேயமான விளக்கத்தை வழங்கினார். “ஆம், எனக்கு கடவுள் நம்பிக்கை இல்லை. ஆனால் என் தாய்க்கு நம்பிக்கை இருந்தது. அவருடைய நம்பிக்கையை மறுக்க நான் யார்? அவரின் விருப்பப்படி அவரை அனுப்புவது தான் மரியாதை,” என்று அவர் கூறினார்.
மேலும், “ஒருவரின் நம்பிக்கையை மதிப்பதே அடிப்படை மனித மரியாதை. வெறுப்பை தூண்டுபவர்கள் இதை புரிந்துகொள்வார்களா?” எனவும் அவர் கேள்வி எழுப்பினார்.
இந்த பதில் சமூக வலைதளங்களில் பெரும் வரவேற்பைப் பெற்றுள்ளது. பலரும் அவரது கருத்தை ஆதரித்து, ‘நம்பிக்கையை மதிப்பது தான் உண்மையான மனிதநேயம்’ எனக் கருத்து தெரிவித்துள்ளனர்.
