தமிழில் முன்னணி நடிகர்களின் வெற்றி படங்களை டிஜிட்டல் முறையில் புதுப்பித்து மீண்டும் திரையரங்குகளில் வெளியிடும் போக்கு தற்போது அதிகரித்து வருகிறது. ரஜினிகாந்தின் ‘பாட்ஷா’, ‘பாபா’, கமல்ஹாசனின் ‘வேட்டையாடு விளையாடு’, ‘ஆளவந்தான்’, விஜயகாந்தின் ‘கேப்டன் பிரபாகரன்’, விஜயின் ‘சச்சின்’, சூர்யாவின் ‘வாரணம் ஆயிரம்’, தனுஷின் ‘யாரடி நீ மோகினி’ உள்ளிட்ட பல படங்கள் ஏற்கனவே மீண்டும் வெளியிடப்பட்டு ரசிகர்களிடையே வரவேற்பை பெற்றன.
அந்த வரிசையில், தற்போது 23 ஆண்டுகளுக்கு பிறகு நடிகர் மாதவன் நடித்த வெற்றிப்படமான ‘ரன்’ திரைப்படம் மீண்டும் திரையரங்குகளில் வெளியாகிறது.
இயக்குனர் லிங்குசாமி இயக்கத்தில் 2002-ஆம் ஆண்டு வெளியான ‘ரன்’ திரைப்படம் காதல் மற்றும் ஆக்ஷன் கலந்த கதைக்களத்துடன் பெரிய வெற்றியை பெற்றது. மாதவன் மற்றும் மீரா ஜாஸ்மின் நடித்த இந்த படம் அப்போது ரசிகர்களிடம் பெரும் வரவேற்பை பெற்றதுடன், வித்யாசாகர் இசையில் உருவான பாடல்களும் சூப்பர் ஹிட்டானது. குறிப்பாக ‘காதல் பிசாசே’, ‘இச்சுதா இச்சுதா’ போன்ற பாடல்கள் இன்றும் ரசிகர்களால் விரும்பிக் கேட்கப்படுகின்றன.
முன்னதாக ‘ரன்’ திரைப்படம் புத்தம் புதிய தொழில்நுட்பத்தில் மறுபடியும் வெளியிடப்படும் என அறிவிக்கப்பட்டிருந்தது. ஏப்ரல் 24-ஆம் தேதி வெளியாகும் என கூறப்பட்டிருந்த நிலையில், சில காரணங்களால் வெளியீடு தள்ளிப்போனது.
இந்நிலையில், படத்தயாரிப்பு நிறுவனம் தற்போது அதிகாரப்பூர்வ அறிவிப்பை வெளியிட்டுள்ளது. அதன்படி, ‘ரன்’ திரைப்படம் வருகிற 10-ஆம் தேதி முதல் தமிழ்நாடு, கேரளா மற்றும் கர்நாடகாவில் மீண்டும் திரையரங்குகளில் வெளியாகிறது.
இந்த அறிவிப்பால் மாதவன் ரசிகர்கள் சமூக வலைதளங்களில் உற்சாகத்தை வெளிப்படுத்தி வருகின்றனர். பழைய வெற்றிப் படத்தை மீண்டும் பெரிய திரையில் பார்க்கும் வாய்ப்பு கிடைப்பதால், எதிர்பார்ப்பு அதிகரித்துள்ளது.
