இணையத்தில் பிரபலமாக வேண்டும் என்ற ஒரே நோக்கில் சில இளைஞர்கள் உயிருக்கு ஆபத்தான செயல்களில் ஈடுபடுவது தொடர்ந்து அதிர்ச்சியை ஏற்படுத்தி வருகிறது. சில ஆண்டுகளுக்கு முன் செல்ஃபி கலாச்சாரம் உச்சத்தில் இருந்தபோது, ஆபத்தான இடங்களில் புகைப்படம் எடுக்க முயன்று பலர் உயிரிழந்தனர்.
அதேபோல், தற்போது அதிவேகமாக ஓடும் ரயிலுக்கு கீழே படுத்துக்கொண்டு வீடியோ எடுத்த ஒரு நபரின் காட்சி இணையத்தில் வைரலாகி பெரும் அதிர்வலைகளை ஏற்படுத்தியுள்ளது.
திரைப்படங்களில் காணப்படும் சில கற்பனை காட்சிகளை உண்மை வாழ்க்கையில் சோதிக்க முயல்வதே இவ்வாறான விபரீத செயல்களுக்கு காரணமாகிறது. ஓடும் ரயிலுக்கு அடியில் படுத்தால் எதுவும் ஆகாது என்ற தவறான நம்பிக்கையுடன், அந்த நபர் தண்டவாளத்தில் படுத்து பல கோணங்களில் தன் முகம் தெரியும் வகையில் வீடியோ பதிவு செய்துள்ளார்.
ரயில் கடந்து சென்ற பிறகு, கேமராவை பார்த்து சிரிக்கும் காட்சியும் அதில் இடம்பெற்றுள்ளது. இந்த வீடியோ எங்கு, யாரால் எடுக்கப்பட்டது என்பது குறித்த உறுதியான தகவல்கள் இதுவரை வெளியாகவில்லை.
இந்த வீடியோவை சமூக வலைதளத்தில் பகிர்ந்தவர் பிரபல விமர்சகரான பிரசாந்த் ரங்கசாமி ஆவார். அவர், “பிரபலமாக வேண்டும் என்பதற்காக தன் உயிரையே பணயம் வைக்கும் முட்டாள்தனம் இது” என கடுமையாக விமர்சித்துள்ளார். அவரது பதிவிற்கு கீழ் பல நெட்டிசன்கள் கவலையும் கோபமும் கலந்த கருத்துகளை பதிவு செய்துள்ளனர்.
பலரும், ரயிலின் அடிப்பகுதியில் இருக்கும் உபகரணங்கள் காரணமாக, அதற்கு கீழ் படுத்துக்கொள்வது மிகவும் ஆபத்தானது என்றும், இது நேரடியாக உயிரிழப்பிற்கு வழிவகுக்கும் செயல் என்றும் எச்சரித்துள்ளனர். சிலர், இத்தகைய செயல்கள் “மரணத்துடன் விளையாடுவது” போன்றது என குறிப்பிட்டு, இளைஞர்கள் இணைய புகழுக்காக இவ்வாறு உயிரை ஆபத்தில் தள்ள வேண்டாம் என்றும் வலியுறுத்தியுள்ளனர்.
இந்த சம்பவம், சமூக வலைதளங்களில் வைரலாகும் ஆபத்தான ட்ரெண்ட்கள் குறித்து மீண்டும் ஒருமுறை தீவிரமான விவாதத்தை உருவாக்கியுள்ளது.
