சமூக வலைதளங்களில் சமீப காலமாக பரவி வரும் ஒரு வீடியோ பல்வேறு விமர்சனங்களையும் தவறான புரிதல்களையும் ஏற்படுத்தியுள்ளது. அந்த வீடியோவில், நூற்றுக்கணக்கான ரசிகர்கள் முன்னிலையில் மேடையில் மேலாடையின்றி பாடும் ஒரு பிரபல பாடகி காணப்படுகிறார். காரணம் தெரியாமல் பலர் அவரை விமர்சித்து பேசி வருகின்றனர்.
உலகம் முழுவதும் மக்களை இணைக்கும் சக்தியாக இசை விளங்குகிறது. மொழி, கலாச்சாரம் ஆகிய எல்லைகளைத் தாண்டி ரசிகர்களை ஈர்க்கும் அந்த இசைக்குரலுக்குச் சொந்தக்காரர் ஃப்ரெஞ்ச் பாடகி ரெபெக்கா. இவர் பிரெஞ்சு இசைக்குழுவான Lulu Van Trapp இன் முக்கிய உறுப்பினரும் முன்னணி பாடகருமாவார்.
சமீபத்தில் அந்த இசைக்குழு நடத்திய இசை நிகழ்ச்சியின் போது, ரெபெக்கா வெறும் பேண்ட் மட்டும் அணிந்து மேலாடையின்றி பாடிய காட்சி பலரால் பதிவு செய்யப்பட்டு இணையத்தில் பகிரப்பட்டது. ஆரம்பத்தில் இதை சர்ச்சையாக மாற்ற முயற்சிகள் நடந்தாலும், அதற்குப் பின்னால் இருந்த உண்மை வெளிவந்தபோது பலரது பார்வை மாறியது.
நிகழ்ச்சியின் ஒரு கட்டத்தில், ரசிகர்களிடையே சென்று மைக்குடன் பாடிக் கொண்டிருந்த போது, கூட்டத்தில் இருந்த இரு ஆண்கள் அவரை ஒழுக்கமற்ற முறையில் தொந்தரவு செய்ததாக தெரிவிக்கப்படுகிறது. இதனை உடனடியாக கண்டித்த ரெபெக்கா, அந்த இருவரையும் நிகழ்ச்சியிடத்திலிருந்து வெளியேறுமாறு கத்தி கூறியுள்ளார். இந்த சம்பவத்திற்குப் பிறகே அவர் மேலாடையை அகற்றி பாடலைத் தொடர்ந்தார்.
இந்த செயல் குறித்து அவர் பின்னர் தெரிவித்த கருத்தில், தன்னைச் சுற்றியுள்ள பார்வை மற்றும் மனநிலையையே கேள்விக்குள்ளாக்க விரும்பியதாக கூறியுள்ளார். “இது சாதாரணமாகும் வரை, இதைப் பாலியல் கோணத்தில் பார்க்கும் மனநிலை மாறும் வரை, நான் இப்படித்தான் பாடுவேன்” என்ற அவரது வார்த்தைகள், பார்வையாளர்களிடையே ஆழ்ந்த தாக்கத்தை ஏற்படுத்தின. நிகழ்ச்சியை நடத்திய அமைப்பாளர்களும் அவருக்கு முழுமையான ஆதரவு வழங்கி பாதுகாப்பாக நின்றனர்.
பெண்கள் சந்திக்கும் பாலியல் தொந்தரவுகளுக்கு அவர்களின் ஆடைதான் காரணம் என்ற பழைய, தவறான கருத்துக்களை உடைத்தெறியும் வகையில், “பிரச்சனை ஆடையில் இல்லை; பார்ப்பவர்களின் பார்வையில்தான்” என்ற செய்தியை வலியுறுத்தவே இந்த செயல் மேற்கொள்ளப்பட்டதாக பலர் புரிந்து கொண்டனர். இதன் மூலம், குற்றம் பாதிக்கப்பட்டவரிடமில்லை; குற்றம் செய்யும் மனநிலையில்தான் இருக்கிறது என்ற கருத்தை ரெபெக்கா வலுவாக முன்வைத்துள்ளார்.
