ரஷ்யாவிடமிருந்து கச்சா எண்ணெய் கொள்வனவு செய்யும் இந்தியா மற்றும் சீனா உள்ளிட்ட நாடுகளுக்கு 100 சதவீதம் வரை வரி விதிக்கும் வகையிலான புதிய சட்டமூலத்திற்கு அமெரிக்க ஜனாதிபதி டொனால்ட் ட்ரம்ப் உத்தியோகபூர்வமாக ஒப்புதல் அளித்துள்ளார்.
உக்ரைன் மீதான போரைத் தொடர்ந்து முன்னெடுத்து வரும் ரஷ்யாவின் பொருளாதாரம் மற்றும் இராணுவ வலிமையை முடக்குவதை நோக்கமாகக் கொண்டு இந்த நடவடிக்கை எடுக்கப்பட்டுள்ளது.
ரஷ்யாவின் தலைமைத்துவப் பிரிவினர் மற்றும் அதன் எரிபொருள் துறையின் மீது பொருளாதாரத் தடைகளை விதிப்பதற்கும், அந்நாட்டிடமிருந்து எண்ணெய் இறக்குமதி செய்யும் நாடுகளுக்கு வரி விதிப்பதற்கும் இந்தச் சட்டம் வழியமைக்கிறது.
அமெரிக்க செனட் சபையில் கடந்த மாதம் நிறைவேற்றப்பட்ட இச்சட்டமூலம், கடந்த 16ஆம் திகதி பிரதிநிதிகள் சபையிலும் நிறைவேற்றப்பட்டது. கடந்த ஜூலை மாதம் மறைந்த குடியரசுக் கட்சியின் நாடாளுமன்ற உறுப்பினர் லிண்ட்சே கிரகாமின் பெயரில் உருவாக்கப்பட்ட இச்சட்டத்திற்கு ட்ரம்ப் நேற்று முன்தினம் கையெழுத்திட்டு ஒப்புதல் வழங்கியுள்ளார்.
ரஷ்யா மற்றும் ஈரானுக்கு எதிராகப் பொருளாதாரத் தடைகளை விரிவுபடுத்துவதற்கும், வரி விதிப்புகளை மேற்கொள்வதற்கும் இந்த லிண்ட்சே சட்டம் ஜனாதிபதி ட்ரம்பிற்கு முழுமையான அதிகாரத்தை வழங்கியுள்ளதாக வெள்ளை மாளிகை உறுதிப்படுத்தியுள்ளது. இந்த புதிய சட்டம் அடுத்த 30 நாட்களுக்குள் உத்தியோகபூர்வமாக நடைமுறைக்கு வரவுள்ளது.
இச்சட்டம் நடைமுறைக்கு வருவதற்கு முன்னைய 12 மாத காலப்பகுதியில் ரஷ்யாவிடம் இருந்து அதிகளவில் எண்ணெய் மற்றும் எரிவாயுவை இறக்குமதி செய்த முதல் ஐந்து நாடுகளுக்கு இந்த 100 சதவீத வரி விதிக்கப்படும்.
புதிய சட்டத்தில் நாடுகளின் பெயர்கள் நேரடியாகக் குறிப்பிடப்படவில்லை என்ற போதிலும், ரஷ்யாவிடமிருந்து அதிகளவில் எண்ணெய் வாங்கும் நாடுகளில் சீனாவுக்கு அடுத்தபடியாக இந்தியா இரண்டாம் இடத்தில் இருப்பதால், இச்சட்டம் இந்தியாவிற்குப் பெரும் பொருளாதார மற்றும் வர்த்தக ரீதியான தாக்கத்தை ஏற்படுத்தக்கூடும் எனக் கருதப்படுகிறது.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
