இங்கிலாந்து அணிக்கு எதிரான இரண்டாவது ஒருநாள் போட்டியில் இலங்கை அணி 16 ரன்கள் வித்தியாசத்தில் சிறப்பான வெற்றியைப் பதிவு செய்துள்ளது. லீட்ஸ் நகரில் நடைபெற்ற இப்போட்டியில் நாணயச் சுழற்சியில் வெற்றி பெற்ற இலங்கை அணி முதலில் துடுப்பெடுத்தாடத் தீர்மானித்தது.
தொடக்க ஆட்டக்காரர் பதும் நிசங்கா 25 ரன்களில் ஆட்டமிழந்த போதிலும், குசால் மெண்டிஸ் மற்றும் கமிந்து மெண்டிஸ் ஜோடி இரண்டாவது விக்கெட்டுக்கு 137 ரன்கள் சேர்த்து வலுவான அடித்தளத்தை அமைத்துக் கொடுத்தது. கமிந்து மெண்டிஸ் 54 ரன்களில் ஆட்டமிழக்க, அபாரமாக ஆடிய குசால் மெண்டிஸ் சதமடித்து அசத்தினார்.
தொடர்ந்து வந்த பவன் ரத்நாயகே 48 ரன்கள் சேர்க்க, இலங்கை அணி நிர்ணயிக்கப்பட்ட 50 ஓவர்களில் 6 விக்கெட் இழப்புக்கு 321 ரன்கள் குவித்தது. இங்கிலாந்து அணித் தரப்பில் கஸ் அட்கின்சன் மற்றும் ரேஹான் அகமது தலா இரண்டு விக்கெட்டுகளை வீழ்த்தினர்.
322 ரன்கள் என்ற கடின இலக்கை நோக்கிப் பதிலுக்குத் துடுப்பெடுத்தாடிய இங்கிலாந்து அணிக்கு டாம் பேண்டன் 73 ரன்களையும், பென் டக்கெட் 67 ரன்களையும் எடுத்து சிறப்பான தொடக்கத்தை அளித்தனர்.
ஜோ ரூட் 15 ரன்களுக்கும், அணித்தலைவர் ஹாரி புரூக் 1 ரன்னுக்கும் அடுத்தடுத்து வெளியேறி பின்னடைவை ஏற்படுத்தினர். பின்னர் இணைந்த ஜாஸ் பட்லர் 69 ரன்களும், வில் ஜாக்ஸ் 52 ரன்களும் எடுத்து அணியை வெற்றிப் பாதைக்குக் கொண்டு செல்லப் போராடினர்.
எனினும், பின்வரிசை வீரர்கள் அடுத்தடுத்து விக்கெட்டுகளை இழந்ததால் இங்கிலாந்து அணி 50 ஓவர்கள் முடிவில் 9 விக்கெட் இழப்புக்கு 305 ரன்களை மட்டுமே எடுத்து தோல்வியைத் தழுவியது.
இலங்கை அணியின் பந்துவீச்சில் துனித் வெல்லலகே 3 விக்கெட்டுகளைக் கைப்பற்றி வெற்றியை உறுதி செய்தார். தில்ஷன் மதுசங்க மற்றும் இஷான் மலிங்க தலா 2 விக்கெட்டுகளையும், அசித பெர்னாண்டோ மற்றும் சச்சிந்து தலா ஒரு விக்கெட்டையும் கைப்பற்றினர்.
இந்த வெற்றியின் மூலம் மூன்று போட்டிகள் கொண்ட ஒருநாள் தொடரை இலங்கை அணி 1-1 என்ற கணக்கில் சமன் செய்துள்ளதுடன், தொடரைத் தீர்மானிக்கும் மூன்றாவது போட்டி மீதான எதிர்பார்ப்பும் அதிகரித்துள்ளது.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
