இந்திய கிரிக்கெட் அணியின் தேர்வுக்குழு தலைவர் பதவியில் இருந்து அஜித் அகர்கர் விலகியதற்கு, அவருக்கும் பிசிசிஐ நிர்வாகத்திற்கும் இடையே நிலவிய தொடர் கருத்து வேறுபாடுகளே முக்கியக் காரணமாக அமைந்ததாக தகவல்கள் வெளியாகியுள்ளன.
ரோகித் சர்மாவின் ஒருநாள் கிரிக்கெட் எதிர்காலம், வி.வி.எஸ். லட்சுமணுடனான முரண்பாடுகள், ஆசிய விளையாட்டுக்கான அணித் தேர்வு மற்றும் சமீபத்தில் நடைபெற்ற முக்கிய ஆய்வுக் கூட்டத்தில் அகர்கர் பங்கேற்காமை ஆகியவை இந்த முடிவுக்குப் பின்னணியாக இருந்துள்ளன.
தென் ஆப்பிரிக்காவில் நடைபெறவுள்ள 2027 ஒருநாள் உலகக் கோப்பையை இலக்காகக் கொண்டு, ரோகித் சர்மாவை ஒருநாள் போட்டிகளில் இருந்து படிப்படியாக விடுவித்து இளம் வீரர் யஷஸ்வி ஜெய்ஸ்வாலுக்கு வாய்ப்பளிக்க வேண்டும் என அகர்கர் திட்டமிட்டிருந்தார்.
எனினும், ரோகித் சர்மா தொடர்ந்து சிறப்பான ஆட்டத்தை வெளிப்படுத்தி வருவதால் அவரது விடயத்தில் அவசரம் காட்டத் தேவையில்லை என்ற நிலைப்பாட்டை பிசிசிஐ எடுத்தது. மேலும், ரோகித் சர்மாவின் ஓய்வு குறித்த வதந்திகளை மறுத்து பிசிசிஐ வெளியிட்ட அறிக்கை அகர்கருக்கு முன்கூட்டியே தெரிவிக்கப்படாதது இரு தரப்பிற்கும் இடையிலான முரண்பாட்டை அதிகரித்தது.
இவற்றுடன், காயமடைந்த வீரர்களைக் கையாளுதல், அவர்களுக்கான உடற்தகுதி மீட்பு கால அட்டவணை மற்றும் இந்தியா ஏ அணியின் தொடர்களை உள்ளூர் போட்டிகளுடன் ஒரே நேரத்தில் நடத்துவது தொடர்பாகவும் வி.வி.எஸ். லட்சுமணுடன் அகர்கருக்குக் கருத்து வேறுபாடுகள் காணப்பட்டன.
அதேபோல், ஆசிய விளையாட்டுப் போட்டிக்கு இந்தியாவின் முன்னணி வீரர்களை முழுமையாகக் களமிறக்குவது குறித்தும் அகர்கர் மாற்றுக்கருத்து கொண்டிருந்ததாகக் கூறப்படுகிறது.
இறுதியாக, இங்கிலாந்து மற்றும் அயர்லாந்து தொடர் தோல்விகள் குறித்து ஆராய்வதற்காக மும்பையில் பிசிசிஐ நடத்திய முக்கிய ஆலோசனைக் கூட்டத்தில் கில், ஸ்ரேயாஸ் அய்யர், கவுதம் கம்பீர், வி.வி.எஸ். லட்சுமண் உள்ளிட்டோர் கலந்துகொண்ட போதிலும், அஜித் அகர்கர் நேரிலோ அல்லது இணைய வழியிலோ பங்கேற்கவில்லை.
மிகக் குறுகிய கால அறிவிப்பில் கூட்டம் கூட்டப்பட்டதால் அவரால் இணைய முடியவில்லை என்று பிசிசிஐ செயலாளர் தேவஜித் சைகியா விளக்கமளித்த போதிலும், இந்த ஆய்வுக் கூட்டத்தில் தேர்வுக்குழுத் தலைவர் பங்குபற்றாதது பிசிசிஐ நிர்வாகத்தினரிடையே அதிருப்தியை ஏற்படுத்தியது. இத்தகைய தொடர்ச்சியான மோதல்களின் விளைவாகவே அவர் பதவியில் இருந்து விலகியுள்ளார்.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
