ரணில் விக்ரமசிங்கவின் பாதுகாப்பு அதிகாரியைத் தாக்கிய ஒளிப்பதிவாளர் கைது

முன்னாள் ஜனாதிபதி ரணில் விக்ரமசிங்கவின் பாதுகாப்புப் பிரிவு உத்தியோகத்தர் ஒருவரைத் தாக்கியதாக சந்தேகிக்கப்படும் தனியார் ஊடக நிறுவனத்தின் ஒளிப்பதிவாளர் கொம்பனித் தெரு பொலிஸாரால் கைது செய்யப்பட்டுள்ளார். 

நேற்று (செப்டம்பர் 30) கோட்டை நீதவான் நீதிமன்றில் இடம்பெற்ற வழக்கு விசாரணையை முடித்துக்கொண்டு முன்னாள் ஜனாதிபதி வெளியேறியபோது, நீதிமன்ற வாயிலில் நின்றிருந்த தனியார் ஊடக ஒளிப்பதிவாளர் ஒருவர் அவரது பாதுகாப்பு அதிகாரிகளில் ஒருவரைத் தாக்கியுள்ளார்.

இந்தச் சம்பவம் தொடர்பான காணொளிகள் சமூக வலைத்தளங்களில் பரவி பெரும் பரபரப்பை ஏற்படுத்தியிருந்தன. 

இந்நிலையில், சம்பவம் குறித்து பாரபட்சமற்ற சுதந்திரமான மற்றும் சுயாதீனமான விசாரணை முன்னெடுக்கப்பட வேண்டும் என்று ஐக்கிய தேசியக் கட்சி இன்று (01.10.2026) நடத்திய ஊடகவியலாளர் சந்திப்பில் வலியுறுத்தியிருந்தது.

இதனைத் தொடர்ந்து, இந்தத் தாக்குதல் சம்பவம் தொடர்பான விசாரணைக்காகக் குறித்த ஒளிப்பதிவாளர் கொம்பனித் தெரு பொலிஸ் நிலையத்திற்கு அழைக்கப்பட்டிருந்த நிலையில் கைது செய்யப்பட்டுள்ளார். இச்சம்பவத்தில் காயமடைந்த பாதுகாப்புப் பிரிவு அதிகாரி சிகிச்சைக்காக வைத்தியசாலையில் அனுமதிக்கப்பட்டுள்ளார்.