ஸ்பெயினில் நிலவும் கடுமையான வீட்டுவசதி பற்றாக்குறை மற்றும் அதீத வாடகை உயர்வைக் கட்டுப்படுத்த பிரதமர் பெட்ரோ சான்செஸ் தலைமையிலான கூட்டணி அரசு கொண்டு வந்த அவசர சட்டத்திற்கு, முக்கிய ஆதரவுக் கட்சியான 'ஜண்ட்ஸ்' எதிர்ப்பு தெரிவித்துள்ளது.
இதனால் நாடாளுமன்றத்தில் பெரும்பான்மை இல்லாத சூழலில் இச்சட்டம் தோல்வியடையும் அபாயம் உருவாகியுள்ளது.
அந்நாட்டில் ஏழை மற்றும் எளிய மக்கள் வாடகை உயர்வால் கடுமையாக பாதிக்கப்பட்டு வரும் நிலையில், கடந்த வாரம் 87 வயது முதியவர் ஒருவர் வீட்டிலிருந்து வலுக்கட்டாயமாக வெளியேற்றப்பட்டார்.
இந்தச் சம்பவத்தைத் தொடர்ந்து கொந்தளித்த ஆயிரக்கணக்கான இளைஞர்கள், தலைநகர் மாட்ரிட்டின் முக்கிய சதுக்கங்களில் கூடாரங்களை அமைத்துப் பிரமாண்டப் போராட்டத்தில் ஈடுபட்டு வருகின்றனர்.
மக்களின் இந்த எதிர்ப்பைத் தணிக்கும் நோக்கில், வாடகை உயர்வைக் கட்டுப்படுத்தவும் ஏழை மக்கள் வீடுகளில் இருந்து வெளியேற்றப்படுவதைத் தடுக்கவும் அரசு புதிய அவசரச் சட்டத்தைக் கொண்டு வந்தது.
இருப்பினும், இந்தச் சட்டம் சொத்துரிமையைப் பாதிப்பதோடு சந்தையில் வாடகை வீடுகளின் எண்ணிக்கையையும் குறைத்துவிடும் என்று கூறி ஜண்ட்ஸ் கட்சி கடைசி நேரத்தில் எதிர்ப்பு தெரிவித்துள்ளது.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
