இந்தோனேசியாவில் 240-க்கும் மேற்பட்ட பயணிகளுடன் சென்ற கப்பல் ஜாவா கடலில் மாயம்

இந்தோனேசியாவில் 241 பயணிகளுடன் பயணித்த பயணிகள் கப்பல் ஒன்று ஜாவா கடல் பகுதியில் திடீரென தொடர்பை இழந்து மாயமாகியுள்ளது. இதனையடுத்து மாயமான கப்பலையும் அதில் இருந்தவர்களையும் தேடும் பணிகளில் மீட்புக் குழுவினர் தீவிரமாக ஈடுபட்டுள்ளனர்.

கிழக்கு ஜாவா மாகாணத்தின் சுரபயா நகரிலிருந்து தெற்கு கலிமந்தான் மாகாணத்தின் பன்ஜர்மாசின் நகரை நோக்கி ‘விர்கோ டிரான்ஸ்போர்ட் 8’ என்ற பயணிகள் கப்பல் புறப்பட்டுள்ளது. நேற்று காலை 10.13 மணியளவில் புறப்பட்ட இந்தக் கப்பல், இன்று அதிகாலை 2 மணியளவில் தகவல் தொடர்பை இழந்ததாக அதிகாரிகள் தெரிவித்துள்ளனர்.

கப்பல் கடைசியாகப் பதிவான தரவுகளின்படி, பன்ஜர்மாசின் துறைமுகத்திலிருந்து சுமார் 148 கிலோமீட்டர் தொலைவில் ஜாவா கடலில் பயணித்தபோது தொடர்பு துண்டிக்கப்பட்டுள்ளது. தகவல் கிடைத்ததும் பன்ஜர்மாசின் மீட்புக் குழுவினர் தேடுதல் நடவடிக்கைகளை ஆரம்பித்துள்ளதுடன், கப்பல் கடைசியாக இருந்ததாகக் கருதப்படும் பகுதிக்கு மீட்புக் கப்பல் ஒன்றையும் விரைந்து அனுப்பியுள்ளனர்.

கப்பலில் அதிகளவான பயணிகள் பயணித்துள்ளதால் மீட்புப் பணிகள் துரிதப்படுத்தப்பட்டுள்ளன. எனினும், கப்பலில் இருந்த பயணிகளின் தற்போதைய நிலை அல்லது உயிரிழப்புகள் குறித்த உத்தியோகபூர்வ தகவல்கள் இதுவரை வெளியாகவில்லை.