எல் நினோ தாக்கம்: பூத்துக் குலுங்கி சோலைவனமாக மாறிய பாலைவனம்

உலகின் மிக வறண்ட பாலைவனங்களில் ஒன்றான சிலியின் அடகாமா பாலைவனம், எல் நினோ பருவநிலை மாற்றத்தால் பெய்த கனமழையைத் தொடர்ந்து வண்ண மலர்கள் பூத்துக் குலுங்கும் பூங்காடாக மாறியுள்ளது.

வழக்கமாக மணல் பரப்பாகக் காட்சியளிக்கும் இந்த வறண்ட பகுதி, தற்போது ஊதா, வெள்ளை மற்றும் தங்க நிறப் பூக்களால் போர்த்தப்பட்டது போல் காட்சியளிக்கிறது. இந்த அரிய இயற்கை மாற்றத்தை நேரில் காண்பதற்கு உலகெங்கிலும் இருந்து ஏராளமான இயற்கை ஆர்வலர்கள் சிலி நாட்டிற்கு வருகை தந்து வருகின்றனர்.

பசிபிக் பெருங்கடலில் நிலவும் எல் நினோ நிகழ்வின் காரணமாக சிலியின் வடக்குப் பகுதி பாலைவனத்தில் 180 மில்லி மீட்டருக்கும் அதிகமான தீவிர மழைப்பொழிவு பதிவாகியுள்ளது.

இதன் விளைவாக, மணலுக்குள் நீண்ட காலமாக உறக்க நிலையில் இருந்த தாவரங்களின் விதைகள் முளைத்து பரவலாகப் பூக்கத் தொடங்கியுள்ளன. உள்ளூர் மொழியில் இந்த நிகழ்வு 'டெசியெர்டோ ப்ளோரிடோ' அதாவது பூக்கும் பாலைவனம் என அழைக்கப்படுகிறது.

சிலியின் தேசிய வனத்துறை வெளியிட்டுள்ள அறிக்கையின்படி, எதிர்வரும் அக்டோபர் மாத இறுதிக்குள் இந்தப் பூக்களின் வளர்ச்சி முழுமையை எட்டும் எனக் கணிக்கப்பட்டுள்ளது.

மேலும், சுமார் 15,000 ஹெக்டேர் பரப்பளவில் இந்த மலர்கள் விரிந்து புதிய சூழலியல் மாற்றத்தை உருவாக்கும் என்றும் அதிகாரிகள் தெரிவித்துள்ளனர். வறண்ட நிலப்பரப்பில் ஏற்பட்டுள்ள இயற்கையின் இந்த மீளுருவாக்கம் சுற்றுச்சூழல் விஞ்ஞானிகளிடையே மிகுந்த வியப்பை ஏற்படுத்தியுள்ளது.