ஆஸ்திரேலியா மற்றும் தென் ஆப்பிரிக்க அணிகளுக்கு இடையிலான மூன்று போட்டிகள் கொண்ட ஒருநாள் தொடரின் முதல் போட்டியில், தென் ஆப்பிரிக்க அணி 67 ரன்கள் வித்தியாசத்தில் சிறப்பான வெற்றியைப் பதிவு செய்துள்ளது.
டர்பனில் உள்ள கிங்ஸ்மீட் மைதானத்தில் நடைபெற்ற இப்போட்டியில் நாணயச் சுழற்சியில் வென்ற ஆஸ்திரேலிய அணித்தலைவர் மிட்செல் மார்ஷ் முதலில் களத்தடுப்பைத் தேர்வு செய்தார். அதன்படி முதலில் துடுப்பெடுத்தாடிய தென் ஆப்பிரிக்க அணிக்கு டெம்பா பவுமா 30 ரன்களும், ரியான் ரிக்கல்டன் 27 ரன்களும் பெற்றனர்.
தொடர்ந்து அபாரமாக ஆடிய மேத்யூ பிரீட்ஸ்கி சதம் விளாசி 112 ரன்கள் குவித்தார். அவருடன் ஆறாவது விக்கெட்டுக்கு 107 ரன்கள் சேர்த்த மார்கோ யான்சென் அதிரடியாக 59 பந்துகளில் 75 ரன்கள் எடுத்தார். தென் ஆப்பிரிக்க அணி நிர்ணயிக்கப்பட்ட 50 ஓவர்களில் எட்டு விக்கெட் இழப்புக்கு 297 ரன்கள் குவித்தது. ஆஸ்திரேலிய அணித் தரப்பில் நாதன் எல்லீஸ் மூன்று விக்கெட்டுகளையும், ஆடம் ஜாம்பா இரண்டு விக்கெட்டுகளையும் வீழ்த்தினர்.
இதையடுத்து, 298 ரன்கள் எடுத்தால் வெற்றி என்ற இலக்குடன் பதிலுக்குத் துடுப்பெடுத்தாடிய ஆஸ்திரேலிய அணிக்கு மிட்செல் மார்ஷ் 36 பந்துகளில் 60 ரன்களையும், டிராவிஸ் ஹெட் 36 ரன்களையும் எடுத்து சிறப்பான தொடக்கத்தை அளித்தனர்.
எனினும், அடுத்து வந்த துடுப்பாட்ட வீரர்கள் தென் ஆப்பிரிக்க அணியின் சுழற்பந்து வீச்சை சமாளிக்க முடியாமல் சீரான இடைவெளியில் விக்கெட்டுகளை இழந்தனர். கூப்பர் கனொலி 38 ரன்களும், மேட் ரென்ஷா 44 ரன்களும், மிட்செல் ஸ்டார்க் 16 ரன்களும் எடுத்த நிலையில் ஏனைய வீரர்கள் சொற்ப ரன்களில் வெளியேறினர். இறுதியில் ஆஸ்திரேலிய அணி 41.2 ஓவர்களில் 230 ரன்களுக்கு அனைத்து விக்கெட்டுகளையும் இழந்தது.
தென் ஆப்பிரிக்க அணியின் பந்துவீச்சில் கேஷவ் மகாராஜ் நான்கு விக்கெட்டுகளை வீழ்த்தி அசத்தினார். கார்பின் போஷ் மற்றும் ஃபோர்டுயின் தலா இரண்டு விக்கெட்டுகளையும், மார்கோ யான்சென் மற்றும் ஜெரால்ட் கோட்ஸீ தலா ஒரு விக்கெட்டையும் கைப்பற்றினர். இந்த வெற்றியின் மூலம் மூன்று போட்டிகள் கொண்ட ஒருநாள் தொடரில் தென் ஆப்பிரிக்க அணி 1-0 என்ற கணக்கில் முன்னிலை பெற்றுள்ளது.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
