மத்திய மாகாணத்தில் பாடசாலை விடுமுறை தொடர்பில் விசேட அறிவிப்பு

நிலவும் சீரற்ற காலநிலை காரணமாக ஏற்படக்கூடிய அனர்த்த சூழ்நிலைகளைக் கருத்திற்கொண்டு, மத்திய மாகாணத்தில் தேவைக்கேற்ப பாடசாலைகளை மூடுவது தொடர்பான முடிவை எடுக்கும் அதிகாரம் வலயக் கல்விப் பணிப்பாளர்களுக்கு வழங்கப்பட்டுள்ளது. 

வலயக் கல்விப் பணிப்பாளர்களும் அதிபர்களும் தத்தமது பகுதிகளில் உள்ள நிலைமைகளை ஆராய்ந்து கலந்துரையாடி உரிய தீர்மானங்களை மேற்கொள்ளுமாறு அறிவுறுத்தப்பட்டுள்ளனர்.

தேவை ஏற்படும் பட்சத்தில், இது தொடர்பாக மாகாணக் கல்விப் பணிப்பாளர் மற்றும் மாகாணக் கல்வி அமைச்சின் செயலாளருக்குத் தெரிவித்து ஆலோசனைகளைப் பெற்றுக்கொள்ள முடியும் என மத்திய மாகாண ஆளுநர் சுரங்க பெர்னாண்டோ தெரிவித்துள்ளார். 

மத்திய மாகாண ஆளுநர் அலுவலகத்தில் நடைபெற்ற ஊடகவியலாளர் சந்திப்பிலேயே அவர் இந்தத் தகவலைப் பகிர்ந்துகொண்டார்.

தொடர்ச்சியாகப் பெய்து வரும் பலத்த மழை காரணமாக நுவரெலியா மற்றும் கண்டி மாவட்டங்களில் உள்ள 38 பாடசாலைகள் நேற்று மூடப்பட்டதாக ஆளுநர் குறிப்பிட்டார். 

அத்துடன், நிலச்சரிவு மற்றும் வெள்ளப்பெருக்கு அச்சுறுத்தல் காரணமாக நாவலப்பிட்டிய பிரதேசத்தில் 66 குடும்பங்கள் இடம்பெயர்ந்துள்ளதுடன், அவர்கள் இம்புல்பிட்டிய கல்லூரி மற்றும் உள்ளூர் வழிபாட்டுத் தலமொன்றில் தற்காலிகமாகத் தங்கவைக்கப்பட்டுள்ளனர்.

தலவாக்கலை பகுதியில் உள்ள 6 குடும்பங்களைப் பாதுகாப்பான இடங்களுக்கு மாற்றுவதற்கான ஏற்பாடுகளும் முன்னெடுக்கப்பட்டுள்ளன.

இதனிடையே, கொத்மலை நீர்த்தேக்கத்தின் நீர்மட்டம் அதன் மொத்தக் கொள்ளளவில் 49 சதவீதமாகவே காணப்படுவதால் பொதுமக்கள் தேவையற்ற அச்சம் கொள்ளத் தேவையில்லை எனப் பொறுப்பு வாய்ந்த பொறியியலாளர் தெரிவித்துள்ளதாக ஆளுநர் தெரிவித்தார்.

மேலும், நாவலப்பிட்டிய பகுதியில் கனமழையால் சேதமடைந்துள்ள 16 நீர் திட்டங்களை விரைவாகச் சீரமைக்கும் பணிகள் முன்னெடுக்கப்பட்டு வருவதாகவும் அவர் மேலும் தெரிவித்தார்.