உலகளாவிய ரீதியில் இரண்டு பிரதான வல்லரசு நாடுகளான சீனாவும் அமெரிக்காவும் புதிய சகாப்தத்தில் இணைந்து பயணிப்பதற்கான சரியான பாதையைக் கண்டறிய முடியும் என்பதில் தாம் முழு நம்பிக்கை கொண்டுள்ளதாக சீன ஜனாதிபதி சீ ஜின்பிங் தெரிவித்துள்ளார்.
அமெரிக்க ஜனாதிபதி டொனால்ட் டிரம்பின் அழைப்பையேற்று உத்தியோகபூர்வ விஜயமொன்றை மேற்கொண்டு நேற்று புதன்கிழமை அமெரிக்காவைச் சென்றடைந்த பின்னர் வெளியிட்ட எழுத்துமூல உரையில் அவர் இந்த விடயத்தைக் குறிப்பிட்டுள்ளார்.
அமெரிக்காவின் ஜோயிண்ட் பேஸ் ஆண்ட்ரூஸ் விமானப்படைத் தளத்தை புதன்கிழமை சென்றடைந்த சீன ஜனாதிபதி சீ ஜின்பிங் மற்றும் அவரது பாரியார் பெங் லியுவான் ஆகியோரை, அமெரிக்க ஜனாதிபதி டொனால்ட் டிரம்ப் மற்றும் அவரது பாரியார் மெலானியா டிரம்ப் ஆகியோர் விமான வாசலுக்கே நேரடியாகச் சென்று நேரில் வரவேற்றனர்.
இரு நாட்டுத் தலைவர்களினதும் இந்த சந்திப்பானது, இருதரப்பு ராஜதந்திர உறவுகளில் ஒரு முக்கிய மைல்கல்லாகக் கருதப்படுகின்றது.
அமெரிக்காவைச் சென்றடைந்த பின்னர் ஆற்றிய உரையில் கருத்துத் தெரிவித்த ஜனாதிபதி சீ ஜின்பிங், சீனாவினதும் அமெரிக்காவினதும் எதிர்கால வளர்ச்சிக்குப் அடுத்த ஆண்டு மிகவும் தீர்க்கமானதொரு காலப்பகுதியாகும் என்று குறிப்பிட்டார்.
கடந்த மே மாதம் ஜனாதிபதி டொனால்ட் டிரம்ப் சீனாவுக்கு மேற்கொண்ட உத்தியோகபூர்வ விஜயத்தின் போது, இரு நாடுகளுக்கும் இடையே மூலோபாய ரீதியாக நிலையான மற்றும் ஆக்கபூர்வமான உறவை ஏற்படுத்துவதற்கு இணக்கம் காணப்பட்டதாகவும், அது எதிர்கால இருதரப்பு உறவுகளுக்கான வழிகாட்டலை வழங்கியுள்ளதாகவும் அவர் சுட்டிக்காட்டினார்.
அத்துடன், சீனாவும் அமெரிக்காவும் ஒரே திசையை நோக்கிப் பயணிக்க வேண்டும் எனவும், ஒத்துழைப்பை முதன்மையாகக் கொண்டதும், கட்டுப்படுத்தக்கூடிய முரண்பாடுகளைக் கொண்டதுமான நிலையான உறவை இரு நாடுகளும் மேம்படுத்த வேண்டும் என்றும் அவர் வலியுறுத்தினார்.
மிதமான போட்டி, முரண்பாடுகளை முறையாக முகாமைத்துவம் செய்தல் மற்றும் உலக அமைதிக்கான வாக்குறுதிகளை முன்னிறுத்தி இருதரப்பு ராஜதந்திர உறவுகள் கட்டியெழுப்பப்பட வேண்டும் எனவும் சீன ஜனாதிபதி தனது உரையில் மேலும் தெரிவித்தார்.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
