மீண்டும் எரிபொருள் விலைத் திருத்தம்: அமைச்சர் வெளியிட்ட தகவல்

உலகச் சந்தையில் எரிபொருள் விலை மீண்டும் அதிகரித்துள்ளதன் காரணமாக, செப்டெம்பர் மாத இறுதியில் எரிபொருள் விலைத் திருத்தம் மேற்கொள்ளப்படக்கூடும் என்று வலுசக்தி அமைச்சர் அனுர கருணாதிலக தெரிவித்துள்ளார்.

காலியில் நடைபெற்ற நிகழ்வொன்றில் கலந்துகொண்டு கருத்துத் தெரிவித்த போதே அவர் இதனைக் குறிப்பிட்டுள்ளார். ஏற்கனவே உள்நாட்டுச் சந்தையில் எரிபொருள் விலை உயர்வான மட்டத்தில் காணப்படுவதால், மேலும் ஒரு விலை அதிகரிப்பை மக்களால் தாங்கிக்கொள்ள முடியுமா என்பது தொடர்பில் அரசாங்கத்திற்குள் தீவிர கலந்துரையாடல்கள் முன்னெடுக்கப்பட்டு வருவதாகவும் அவர் சுட்டிக்காட்டியுள்ளார்.

மத்திய கிழக்கு பிராந்தியத்தில் ஏற்பட்டுள்ள போர்ச் சூழலால் சர்வதேச சந்தையில் எரிபொருள் விலையில் பெரும் ஏற்ற இறக்கங்கள் காணப்படுவதாக அமைச்சர் விளக்கமளித்துள்ளார்.

முன்னதாக மார்ச் மற்றும் ஏப்ரல் மாதங்களில் உள்நாட்டில் எரிபொருள் விலையை ஓரளவு அதிகரிக்க நேரிட்டதாகவும், பின்னர் சர்வதேச சந்தையில் விலை குறைந்த போது உள்நாட்டிலும் விலைக் குறைப்பு மேற்கொள்ளப்பட்டதாகவும் அவர் நினைவுகூர்ந்தார்.

எனினும், மீண்டும் போர் தீவிரமடைந்துள்ள காரணத்தால் உலகச் சந்தையில் எரிபொருள் விலை உயர்ந்துள்ளதாகவும், வழமையாக ஒவ்வொரு மாத இறுதியிலும் இறக்குமதி செலவுகளின் சராசரிப் பெறுமதியை ஆராய்ந்து மேற்கொள்ளப்படும் மீளாய்வு, இம்மாத இறுதியிலும் இடம்பெறவுள்ளதாகவும் அவர் குறிப்பிட்டுள்ளார்.

அதேவேளை, எரிபொருள் விநியோகத்தில் ஈடுபட்டுள்ள சில தனியார் நிறுவனங்களே தற்போதைய சூழலில் நட்டத்தை எதிர்கொள்வதாகத் தெரிவித்துள்ளன.

இதன் காரணமாக அந்நிறுவனங்கள் சந்தைக்கான டீசல் விநியோகத்தை மட்டுப்படுத்தியுள்ளதாகத் தெரிவித்த அமைச்சர், சட்டரீதியான வழிவகைகளை ஆராய்ந்து, ஒரு குறிப்பிட்ட உயர்ந்தபட்ச மற்றும் குறைந்தபட்ச விலையெல்லைக்குள் அந்த நிறுவனங்களே தங்களுக்கான விலையைத் தீர்மானித்து விற்பனை செய்வதற்கு வாய்ப்பளிக்க முடியுமா என்பது தொடர்பிலும் ஆலோசிக்கப்பட்டு வருவதாகத் தெரிவித்துள்ளார்.