பாகிஸ்தானின் லாகூர் நகரின் புறநகர்ப் பகுதியான கஹ்னாவில் செயல்பட்டு வந்த ஒரு தனியார் பயிற்சி மையத்தில், கூரை இடிந்து விழுந்த பயங்கர விபத்தில் 14 சிறுவர்கள் உயிரிழந்துள்ளனர். இந்த சம்பவம் அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது.
உள்ளூர் நேரப்படி மாலை 4:45 மணியளவில் மீட்பு பணியாளர்களுக்கு அவசர அழைப்பு வந்தது. உடனடியாக விரைந்த ரெஸ்கியூ 1122 குழுவினர், மிக வேகமாகச் செயல்பட்டு ஒரு மணி நேரத்திற்குள் மீட்பு நடவடிக்கைகளை நிறைவு செய்தனர். மீட்கப்பட்ட குழந்தைகளில் பெரும்பாலானவர்கள் 7 முதல் 11 வயதுக்குட்பட்டவர்கள் என்பது மேலும் வேதனை அளிக்கிறது. இந்த விபத்தில் 5 குழந்தைகள் காயமடைந்துள்ளதாகவும், அவர்கள் மருத்துவமனையில் சிகிச்சை பெற்று வருவதாகவும் அதிகாரிகள் தெரிவித்துள்ளனர்.
இந்த சம்பவம் குறித்து, தனது மருமகள் இந்த விபத்தில் உயிரிழந்தவர்களில் ஒருவர் என்று அடையாளம் காட்டிய ஜாஹிர் என்பவர், அந்தக் கட்டிடத்தின் மேற்கூரை மிகவும் மோசமான நிலையில் இருந்ததாகவும், பழுது பார்க்கும் பணி நடைபெற்று வந்ததாகவும் கூறியுள்ளார். அப்போது குழந்தைகள் கீழே வகுப்பில் ஈடுபட்டுக் கொண்டிருந்த வேளையில், கூரையில் டைல்ஸ் அமைக்கும் பணி நடந்துள்ளது. அந்த பணியின் காரணமாக கூரையில் அதிக பளு ஏற்பட்டதால் திடீரென அது சரிந்து விழுந்ததாக அவர் செய்தி நிறுவனத்திடம் தெரிவித்துள்ளார்.
விபத்து நடந்த இடத்தில் இருந்த மற்றொரு உள்ளூர் குடியிருப்பாளர், "இப்படி ஒரு சோகத்தில், இழந்த குழந்தைகளின் பெற்றோருக்கு ஆறுதல் சொல்ல முதலில் எந்த வீட்டிற்குச் செல்வது என்றே புரியவில்லை" என்று தனது வேதனையை வெளிப்படுத்தியுள்ளார்.
இந்த சம்பவம் குறித்து பாகிஸ்தான் பிரதமர் ஷெஹ்பாஸ் ஷெரீஃப் தனது ஆழ்ந்த இரங்கலைத் தெரிவித்ததோடு, காயமடைந்தவர்கள் விரைவில் குணமடைய வேண்டி பிரார்த்திப்பதாகவும், அவர்களுக்கு தேவையான அனைத்து மருத்துவ உதவிகளையும் வழங்குமாறு அதிகாரிகளுக்கு உத்தரவிட்டுள்ளார்.
பஞ்சாப் மாநில முதலமைச்சர் மேரியம் நவாஸ் ஷெரீஃப் இந்த விபத்தை "இதயத்தைப் பிளக்கும் துயர சம்பவம்" எனக் குறிப்பிட்டு வருத்தம் தெரிவித்துள்ளார். தனது எக்ஸ் பக்கத்தில் பகிர்ந்துள்ள செய்தியில், "14 அப்பாவி குழந்தைகளின் இழப்பு ஈடு செய்ய முடியாத சோகம்; இந்த துக்கத்தில் துவண்டுபோன குடும்பங்களுக்கு என் மனமார்ந்த ஆறுதல்கள்" எனக் கூறியுள்ளார். மேலும், இந்த விபத்திற்கு காரணமானவர்கள் யாராக இருந்தாலும், அவர்கள் கண்டிப்பாக சட்டத்தின் முன் நிறுத்தப்படுவார்கள் எனவும் உறுதியளித்துள்ளார்.
சம்பவம் குறித்து அதிகாரிகள் தீவிர விசாரணை நடத்தி வரும் நிலையில், பூர்வாங்க விசாரணையில் இருவர் கைது செய்யப்பட்டுள்ளனர். இந்த துயரச் சம்பவம், பள்ளிகள் மற்றும் பயிற்சி மையங்களில் கட்டிடப் பாதுகாப்பு குறித்த கேள்விகளை மீண்டும் எழுப்பியுள்ளது.
(தலைமுறை)
Stay informed on all the latest news, real-time breaking news updates, and follow all the important headlines in sri lanka news and world news on Thalaimurai.
