நைஜீரியாவில் மீண்டும் விவசாயிகள் படுகொலை – ஜம்பாராவில் 15 பேர் சுட்டுக்கொலை

நைஜீரியாவில் ஆயுதமேந்திய கும்பல்களின் வன்முறைச் செயல்கள் தொடர்ந்து அதிகரித்து வருகின்றன. ஜம்பாரா மாகாணத்தின் தலடா மபாரா பகுதியில் வழக்கமான விவசாயப் பணிகளில் ஈடுபட்டிருந்த விவசாயிகள் மீது ஆயுதக் கும்பல் ஒன்று திடீரென துப்பாக்கிச் சூடு நடத்தியதில் 15 பேர் உயிரிழந்தனர். தாக்குதலை நடத்திய கும்பலினர் சம்பவ இடத்திலிருந்து தப்பி ஓடிவிட்டனர்.

இந்த மாத தொடக்கத்தில், ஜம்பாரா மாகாணத்தின் கொரோன் நமயே பகுதியிலும் இதே போன்ற தாக்குதல் நடந்திருந்தது. அப்போது விவசாய நிலத்தில் பணிபுரிந்துகொண்டிருந்த 17 விவசாயிகள் சுட்டுக்கொல்லப்பட்டனர், மேலும் 13 பேர் காயமடைந்தனர்.

இருப்பினும், இந்த வன்முறைச் சம்பவங்கள் தொடர்வதை தடுக்க அரசு இதுவரை கடுமையான நடவடிக்கைகளை எடுக்கத் தவறிவிட்டதாக குற்றச்சாட்டுகள் எழுந்துள்ளன.

நைஜீரியாவில் தெற்குப் பகுதிகளில் கிறிஸ்தவர்களும், வடக்குப் பகுதிகளில் முஸ்லிம்களும் அதிக அளவில் வசிக்கின்றனர். எனினும், இந்த வன்முறைச் செயல்கள் மத பாகுபாடின்றி அனைத்து தரப்பினரையும் பாதித்து வருகின்றன.

ஆயுதமேந்திய கும்பல்கள் கிராமங்களுக்குள் புகுந்து மக்களை துப்பாக்கியால் சுடுவதும், பணயக் கைதிகளாக பிடித்து வைத்து மீட்கும் தொகை கேட்டு மிரட்டுவதும் வழக்கமாகிவிட்டது. மேலும், சட்டவிரோத சுரங்கத் தொழிலும் பல ஆண்டுகளாக அப்பகுதியில் தொடர்ந்து நடைபெற்று வருவது குறிப்பிடத்தக்கது.

வன்முறைக்கு எதிராக கடும் நடவடிக்கை எடுக்கப்படும் என்று அரசு நிர்வாகம் உறுதியளித்த போதிலும், தாக்குதல்கள் தொடர்ந்து நடந்து வருவதால், அப்பகுதி மக்கள் அச்சத்திலும் பாதுகாப்பின்மையிலும் வாழ்ந்து வருகின்றனர். இச்சம்பவங்கள் குறித்து பொலிஸார் மேலதிக விசாரணைகளை மேற்கொண்டு வருகின்றனர்.