சிறுநீரக பாதிப்பில் இருந்து மீண்ட இந்திய வம்சாவளி சிறுமி: ஒரு நாள் விமானப் பணிப்பெண் கனவை நனவாக்கிய காண்டாஸ் நிறுவனம்

தீராத சிறுநீரக பாதிப்பில் இருந்து மீண்ட ஆஸ்திரேலியாவைச் சேர்ந்த 12 வயது இந்திய வம்சாவளி சிறுமி த்ரிஷா செவ்வனேயின் வாழ்நாள் ஆசையை காண்டாஸ் விமான நிறுவனம் நிறைவேற்றியுள்ளது.

மெல்போர்ன் அமைந்துள்ள விக்டோரியா மாகாணத்தைச் சேர்ந்த இச்சிறுமி, நிஜ பயணிகள் விமானத்தில் ஒரு நாள் பணிப்பெண்ணாகப் பணியாற்றி தனது நீண்ட நாள் கனவை நனவாக்கிக் கொண்டார்.

த்ரிஷாவுக்கு நான்கு வயதாக இருந்தபோதே கடுமையான சிறுநீரகப் பாதிப்பு கண்டறியப்பட்டது. தொடர்ந்து மருத்துவமனையிலேயே சிகிச்சை பெற்று வந்த இவருக்கு, கடந்த 2024-ம் ஆண்டு அவரது தாயார் மிஷெல் தனது ஒரு சிறுநீரகத்தை தானமாக வழங்கினார்.

சிறுநீரக மாற்று அறுவை சிகிச்சை வெற்றிகரமாக முடிந்த நிலையில், நோயின் பிடியில் இருந்து த்ரிஷா முழுமையாகக் குணமடைந்தார். தொடர் மருத்துவப் பரிசோதனைகளின் போது விமானங்களில் பயணித்த த்ரிஷா, அங்கு பணிப்பெண்கள் ஆற்றிய சேவைகளால் ஈர்க்கப்பட்டு தானும் ஒரு நாள் விமான பணிப்பெண்ணாக வேண்டும் என விரும்பினார்.

சிறுவர்களின் விருப்பங்களை நிறைவேற்றி வரும் ‘மேக்-ஏ-விஷ்’ அமைப்பும் ஆஸ்திரேலியாவின் காண்டாஸ் விமான நிறுவனமும் இணைந்து த்ரிஷாவின் ஆசையை நிஜமாக்க முன்வந்தன.

இதற்காக சிட்னியில் உள்ள காண்டாஸ் பயிற்சி மையத்தில் அவசரகால பாதுகாப்பு நடைமுறைகள் மற்றும் விருந்தோம்பல் குறித்த முறையான பயிற்சிகள் அவருக்கு அளிக்கப்பட்டன. மேலும், த்ரிஷாவின் அளவிற்கு ஏற்ப பிரத்யேகமாகத் தைக்கப்பட்ட அதிகாரப்பூர்வ சீருடை மற்றும் சிறப்பு அடையாள முத்திரையும் வழங்கப்பட்டது.

பயிற்சி நிறைவடைந்ததைத் தொடர்ந்து, கடந்த மாதம் 15-ம் தேதி சிட்னியில் இருந்து அடிலெய்டு சென்ற கியூஎப்735 பயணிகள் விமானத்தில் த்ரிஷா பணிப்பெண்ணாகப் பொறுப்பேற்றார்.

விமானத்தில் ஒலிபெருக்கி வாயிலாகப் பாதுகாப்பு வழிகாட்டுதல்களை அறிவித்தது, பயணிகளை வரவேற்றது மற்றும் தள்ளுவண்டி மூலம் சிற்றுண்டிகளைப் பரிமாறியது என அனைத்து பணிகளையும் நேர்த்தியாக மேற்கொண்டார்.

அவருக்கு மூத்த விமான பணிப்பெண் ஆஷ்லி பிஷர் வழிகாட்டியாகத் துணை நின்றார். இந்த நெகிழ்ச்சியான தருணங்கள் அடங்கிய காணொளியை காண்டாஸ் நிறுவனம் சமூக வலைதளங்களில் பகிர்ந்த நிலையில், பலரும் த்ரிஷாவின் தன்னம்பிக்கையையும் விமான நிறுவனத்தின் முயற்சியையும் பாராட்டி வருகின்றனர்.